【專訪】擁躉相信曼聯防線會改善

【Now Sports】打吡大戰當前，雖然曼聯連續3場聯賽失兩球，不過香港曼聯官方球迷會代表認為經過球員狀態提升，相信愛隊防守會有所改善。

問：記者
答：Bob（香港曼聯官方球迷會會長）

問：相對於其他勁旅，曼聯今季人腳變動唔算大，符合你哋球迷預期？
Bob：今年球隊嘅歐聯比賽數目增加，本身就需要更多球員應對。雖然中場有3位新球員填補咗卡斯美路離隊，同埋烏加迪受傷嘅空缺，但左閘冇買到新球員，而只剩梳爾一個正宗左閘，觀察到唔少球迷，對暑假轉會窗嘅結果未算最滿意，但總括而言都算合格。

問：球隊開季3場聯賽都失兩球，後防出現問題？
Bob：我諗失波唔一定只係後防問題，現代足球一環扣一環，有時只有一個細節做得唔好就會引致失波。不過經過周中歐聯大勝，有部份球員得到休息、少踢嘅球員亦獲得落場時間，狀態同信心都有所提升，相信往後比賽嘅防守會有所改善。

問：點睇今晚打吡大戰？曼聯有咩爭勝有利因素？
Bob：曼城開季3連勝氣勢如虹，不過同市打吡，往往都好睇球員嘅肉緊同拼搏程度，加上有主場之利，希望可以打得番上季主場對曼城嘅氣勢。

問：估計戰局會點發展？比數如何？
Bob：戰果同比數就唔估嘞，呢啲嘢估親通常都好邪，哈哈。總之希望打出應有嘅拼勁畀球迷睇，大家都會收貨。

問：球迷會新一季有何活動/部署？
Bob：一如以往，都繼續有大大小小嘅睇波活動，由上季開始有部份移師戲院進行，反應熱烈，今季都會繼續。最近曼聯U16小將嚟香港比賽，球迷會都幫會員爭取到門票入場打氣，另外都會嘗試搞非足球相關嘅活動畀會員參與，例如上季除咗會員大會聚餐外，都有搞過文化導賞團，各位會員有咩提議都歡迎向我哋提出！

英超 曼聯 對 曼城
Now TV 621台 13/09 23:30直播
Now TV 611台 4K直播

加列沙卡認持偽疫苗證明受查

3小時前

謝拉特：熱刺冇球星難感畏懼

4小時前

得而復失！高爾彭馬傷退英軍

7小時前

【英超‧波圓】栽種絕處的花

10小時前

【場上對弈】衛冕之師爆冷遇挫 季初群雄亂局藏隱憂

11小時前