【十三短打】意大利躉，麻木晒……？

【Now Sports】決戰前夕，迪斯高話意大利冇托迪、迪比亞路，今時唔同往日。當然，如果藍軍仲有類似王牌球星，斷估未必淪落到要踢附加賽。連續3屆，今屆仲係增加到48隊嘅決賽周，都進入唔到門檻，意大利躉，係咪已經麻木晒……？
撰文：球十三

其實呢場波，波斯尼亞龍門已經一早送大禮畀意大利，藍軍唔能夠晉級，只怪自己唔爭氣。「踢成咁，入到去都係分組賽收工。」當唔少意大利躉同聲一哭，網上自然有類似洩氣留言。

如果傷完冇耐嘅中堅巴斯東尼落腳快啲，未必犯規攞嗰面紅牌、如果堅恩嗰球單刀唔係射到離行離列就領先兩球，又如果擅射12碼嘅利迪基唔係戰術需要一早被換走，互射12碼由佢先操刀，或者唔會即刻宴客洩晒氣……

……太多如果，更實在，呢兩場附加賽完全反映，意大利好多球員質素唔夠。

都係要講多個如果。加時，當意大利禁區頂有個罰球機會，東拿利省中人牆，意大利躉嗰刻，有冇諗起如果托迪、迪比亞路在陣，你話幾好。東拿利已經係意大利軍中狀態、級數比較好嘅一個，但，顯然談唔上夠班撐起隊波。

當拿隆馬已經好叻仔，救好多球波，就算波斯尼亞球奠勝12碼，佢其實都擋到。時也命也，只得一個世界級龍門，唔足以帶隊波踢世界盃。

意大利20年前攞世界盃冠軍，之後發展一路向下走，2020年（2021年踢）歐洲國家盃只係食盡最後老本，老鬼基亞連尼、邦奴治撐住，而個別球員好似恩薛尼、費達歷高基艾沙踢得好好，可一不可再。意大利人才凋零，聯賽水平每況愈下，睇意甲隊咁快喺歐聯全軍盡墨，好慘烈。

人人都識講意大利足球要再由青訓做起，問題係，已經麻木嘅球迷，仲要等幾耐？

撰文：球十三
足球迷叫第十二人，冇偏愛，冷眼旁觀係十三。

世界盃48列強全落實 亞洲共9隊角逐

3小時前

遲來的復仇 巴西3：1「克」敵

4小時前

FIFA博物館5月首度登陸香港

5小時前

波斯尼亞晉級 迪斯高擁吻愛妻

5小時前

美斯主場告別戰 阿根廷炒贊比亞5蛋

6小時前